Fréttir & tilkynningar

Í haust erum við búinn að frá tvo rithöfunda í heimsókn til okkar í 5. bekk til að kynna nýju bækurnar sínar. Ævar Þór Benediktsson kom og kynnti Teiknimyndaránið og Kristrún Guðmundsdóttir kynnti Appelsínugulur himinn yfir Austurbæjarskóla. Við þökkum þeim kærlega fyrir heimsóknina. 

Það var líf og fjör hjá stelpunum i 5.KB í heimilisfræði í morgun þegar þær bökuðu græna Nornafingur í tilefni að Hrekkjavökunni. Baksturinn tókst vel og var þetta fullkomin leið á að komast í Hrekkjavökugírinn.

Gleðin leynir sér ekki hjá nemendunum 3. bekkjar í útikennslu í skógræktinni.  Allir finna sér eitthvað að gera hvort sem það sem er að smíða, tálga, raka laufblöð, finna skordýr eða bara leika sér og njóta með bekkjarfélögunum í þessu dásamlega umhverfi.

Hálka hefur gert vart við sig á götum og göngustígum undanfarna daga og eru vegfarendur hvattir til að sýna sérstaka aðgát. Nokkur börn hafa þegar dottið á reiðhjólum vegna hálkunnar. Af því tilefni er foreldrum og forráðamönnum ráðlagt að hvetja börn til að skilja hjólin eftir heima á meðan hálka er á götum og stígum. Jafnframt er minnt á mikilvægi góðs skófatnaðar og endurskinsmerkja, auk þess sem fólk er hvatt til að gefa sér góðan tíma á ferðum sínum. Förum varlega og komum öll heil heim ❤️

Grundaskóli tekur þátt í Vökudögum.

Grundaskóli tekur þátt í þróun nýs námsumsjónarkerfis í samstarfi við Comenius Grundaskóli tekur nú þátt í spennandi þróunarverkefni í samstarfi við sprotafyrirtækið Comenius, sem vinnur að gerð nýs námsumsjónarkerfis fyrir skóla. Markmiðið er að draga úr tímafrekri skráningarvinnu og bæta upplýsingaflæði milli heimila og skóla. Gangi áætlanir eftir gæti fyrsta útgáfa kerfisins verið tilbúin á fyrstu mánuðum næsta árs. Stjórnendur og starfsfólk Grundaskóla hafa um árabil haft mikinn áhuga á að þróa og bæta þau stafrænu kerfi sem notuð eru í skólastarfi. Fyrir nokkrum árum réðst skólinn í metnaðarfulla tilraun með innleiðingu námsumsjónarkerfisins Weduc. Þótt sú innleiðing hafi ekki gengið að öllu leyti samkvæmt væntingum skilaði verkefnið dýrmætri reynslu og mikilvægum lærdómi sem nýtist nú í áframhaldandi þróunarstarfi. Nú hefur þráðurinn verið tekinn upp að nýju með samstarfi við sprotafyrirtækið Comenius. Unnið er að þróun nýs námsumsjónarkerfis í nánu samstarfi við teymi skólafólks, þar sem reynsla og þarfir þeirra sem starfa í skólum eru hafðar að leiðarljósi. Einfaldara skólastarf og betra upplýsingaflæði Stefnt er að því að Comenius geti í framtíðinni leyst Mentor af hólmi og boðið upp á nútímalegri og skilvirkari lausnir fyrir skólasamfélagið. Áhersla er lögð á að draga úr tvíverknaði, spara starfsfólki tíma og auðvelda samskipti og upplýsingamiðlun milli skóla og heimila. Einn af helstu kostum kerfisins er fyrirhuguð samþætting við önnur stafræn kerfi sem skólar nýta nú þegar. Comenius er hannað til að sækja upplýsingar um nemendur, forráðamenn og skráningar beint úr Nemendagrunni og tengjast Google Classroom. Þannig er markmiðið að upplýsingar þurfi aðeins að skrá einu sinni og að þær birtist sjálfkrafa þar sem þeirra er þörf. Einnig eru fyrirhugaðar tengingar við námstól á borð við Læsi og Evolytes sem margir þekkja. Með þessu er stefnt að því að skapa heildstæðara og notendavænna starfsumhverfi fyrir kennara, stjórnendur, nemendur og foreldra. Comenius kynnt á lokadegi Startup SuperNova Fulltrúar Comenius tóku á þessu ári þátt í Startup SuperNova 2026, sex vikna viðskiptahraðli á vegum KLAK – Icelandic Startups, Nova og Huawei, með stuðningi frá Grósku. Á lokadegi hraðalsins, 18. september síðastliðinn, var Comenius kynnt og fyrsta útgáfa kerfisins sýnd. Þar gafst tækifæri til að kynna hugmyndafræðina að baki verkefninu og þá möguleika sem nýtt námsumsjónarkerfi getur skapað fyrir íslenskt skólastarf. Spennandi skref í þróun skólastarfs Samstarfið við Comenius er liður í þeirri viðleitni Grundaskóla að leita stöðugt leiða til að þróa skólastarfið og nýta tæknina á markvissan hátt. Mikilvægt er að stafræn kerfi þjóni þörfum skólasamfélagsins, séu einföld í notkun og styðji við það sem mestu máli skiptir – nám, kennslu og farsæl samskipti. Enn er töluverð þróunarvinna fram undan, en verkefnið lofar góðu og verður áhugavert að fylgjast með framgangi þess á næstu mánuðum.  Áhugasamir geta horft á upptöku af kynningu Comenius á lokadegi Startup SuperNova hér: Horfa á kynningu Comenius

Í 9. og 10. bekk er verið að vinna eftir kennsluaðferðinni að skapa hugsandi skólastofu í stærðfræði. Ein af þrautunum sem lögð var fyrir nemendur var að þau fengu fjóra fjarka og verkefni þeirra var að setja einhverjar reikniaðgerðir á milli þannig þau fengju svör frá 1 og upp í 10. 4 4 4 4 = 1 4 4 4 4 = 2 4 4 4 4 = 3 o.s.frv.  Þessi þraut reyndi töluvert á nemendur og var því ákveðið að framlengja verkefnið fram á gang í keppni á milli nemenda. Í verkefninu sem hengt var fram á gang þurftu nemendur að finna svör frá 11-100. Einnig var auka blöðum bætt til hliðar þar sem nemendur gátu skráð ef þau hefðu aðrar lausnir en þær sem þegar voru uppkomnar. Sigurvegari þessarar þrautar var Daði Rafn Reynisson í 9. bekk en hann kom með svör við hvorki meira né minna en 111 dæmum. Í öðru sæti var Tinna María Sindradóttir nemandi í 10. bekk. Vel gert krakkar.

… nú hefst ævintýrið! Við auglýsum eftir hugmyndum fyrir uppsetningu á frumsömdum nýjum söngleik sem fyrirhugað er að setja upp skólaárið 2027-2028 í Grundaskóla. Við leggjum af stað með tvær hendur tómar, en vonandi fullt af hugmyndum í farteskinu. Ekkert handrit, engin lög og engin fyrir fram ákveðin saga – bara opinn hugur, sköpunarkraftur og ótal möguleikar. Hvernig söngleik langar okkur að skapa? Hvaða sögu viljum við segja? Hvaða persónur, tónlist, húmor og ævintýri gætu orðið hluti af sýningunni? Við erum rétt að hefja ferðalagið og viljum fá sem flesta með okkur. Öll stór ævintýri byrja á lítilli hugmynd. 🎶 Tökum fyrsta skrefið saman – sköpum nýjan söngleik í Grundaskóla! 🎶  🎭 Engin saga - Engin lög - Engin takmörk. Enn sem komið er! Við ætlum að: Safna hugmyndum frá nemendum, starfsfólki og öllu skólasamfélaginu. Kalla saman öflugt og skapandi teymi sem hefur áhuga á að taka þátt í verkefninu. Skoða hugmyndirnar, velta upp möguleikum og finna sameiginlega stefnu. Leggja grunn að nýjum, frumsömdum söngleik sem verður til í skapandi samstarfi í skólanum okkar.

Mikið hefur borið á því að nemendur okkar sjáist illa í myrkrinu og framundan eru myrkustu mánuðir ársins. Til að forðast slys viljum við að allir taki umræðuna með börnum sínum um mikilvægi endurskinsmerkja og tryggja að þau séu notuð. Það er staðreynd að ökumenn sjá gangandi vegfarendur með endurskinsmerki fimm sinnum fyrr en ella og því getur notkun þeirra skilið milli lífs og dauða.  Einnig viljum við ítreka beiðni um að nota ávallt gangbraut þegar farið er yfir akbraut. Sýnum öll aðgát í umferðinni - Við viljum öll koma heil heim.

Fjölbreytt og skemmtileg dagskrá á Vökudögum Það verður sannkölluð menningarveisla á Vökudögum sem fram fara dagana 22. október til 1. nóvember. Fjölbreytt dagskrá verður í boði fyrir alla aldurshópa og ættu flestir að geta fundið eitthvað við sitt hæfi. Á meðal þess sem boðið verður upp á eru fjölbreyttar listasýningar víðs vegar um bæinn, tónleikar, kvikmyndasýningar og skemmtilegar smiðjur fyrir börn og fjölskyldur þeirra, svo fátt eitt sé nefnt. Við vekjum sérstaka athygli á fimm frístundatilboðum fyrir nemendur og foreldra tengt Opna skólanum. Sjá: https://www.vokudagar.is/vidburdir/opni-skolinn-list--og-verkgreinar-grundaskoli Vökudagar eru kjörið tækifæri fyrir fjölskyldur til að njóta samveru, upplifa menningu og listir og taka þátt í fjölbreyttum viðburðum. Heimasíða Vökudaga Áhugafólk um hátíðina er hvatt til að kynna sér dagskrána á heimasíðu Vökudaga, www.vokudagar.is , þar sem finna má upplýsingar um þá fjölmörgu viðburði sem verða í boði. Foreldrar og forráðamenn eru sérstaklega hvattir til að skoða dagskrána með börnum sínum og finna saman eitthvað skemmtilegt til að taka þátt í. Einnig má fylgjast með fréttum og viðburðum á Facebook-síðu Vökudaga .  Takið dagana frá og njótið fjölbreyttrar menningar- og fjölskyldudagskrár á Vökudögum!

Uppsetning á söngleik er samvinnuverkefni skólasamfélags og í Grundaskóla iðar allt af lífi langt fram á nótt og allir glaðir. Hér erum við að ræða um Opinn skóla 😊

Nú eru Förustafirnir farnir að stækka það mikið að óhætt er að taka þá úr búrinu. Þeir vekja mikla lukku hjá mörgum nemendum sem vilja ólmir taka þá til sín og leyfa þeim að vera með sér á meðan þeir eru í kennslustund.  Förustafirnir eru farnir að fá hin ýmsu nöfn á meðan þeir eru að læra með nemendum. Það er gaman að fylgjast með áhuga nemenda á þessu saklausu dýrum í náttúrfræðistofunni.

Nokkrir áhugasamir lestrarhestar í 5. bekk taka þátt í bókaklúbbi sem hittist einu sinni í viku. Þar hafa þær kynnt uppáhaldsbækur sínar fyrir hvor annarri, lesið upp úr bókum og eru nú byrjaðar í samlestri. Um þessar mundir er hópurinn að lesa bókina Silfurlykilinn eftir Sigrúnu Eldjárn og hafa skapast líflegar og skemmtilegar umræður um söguna.  Bókaklúbburinn er hluti af verkefninu Opni skólinn.

Á níunda hundrað manns, nemendur Grundaskóla, starfsfólk og gestir komu í dag og dönsuðu saman í tilefni 45 ára afmælis skólans.  Hér ríkir bæði gleði og samstaða. 😍 😍 😍

Kvöld og um helgar vinna foreldrar í samvinnu við börn sín og starfsfólk skólans að uppsetningu á söngleiknum Frelsi. Takk fyrir samvinnuna gott fólk - Við erum sterk liðsheild í Grundaskóla

Til hamingju með daginn - Grundaskóli 45 ára.  Í dag fagnar Grundaskóli 45 ára afmæli, en skólinn tók fyrst til starfa þann 6. október 1981.

Nemendur 3. bekkjar bjuggu til þessar fallegu afmælisblöðrur og óska Grundaskóla til hamingju með 45 ára afmælið með þessum fallegu orðum.  Bestu kveðjur 3. bekkur

Grundaskóli tilnefndur til Íslensku menntaverðlaunanna 2026 Grundaskóli hefur verið tilnefndur til íslensku menntaverðlaunanna í flokknum; Framúrskarandi skólastarf eða menntaumbætur . Alls eru þrjár menntastofnanir tilnefndar í þessum flokki. Tilkynnt verður um hver hlýtur verðlaunin við hátíðlega athöfn á Bessastöðum í byrjun nóvember.  Nánar má lesa um íslensku menntaverðlaunin, flokkana sem veitt eru verðlaun í og tilnefningar í hverjum flokki hér: https://skolathroun.is/tilnefningar-til-islensku-menntaverdlaunanna-2026-2/ Þess má geta að Grundaskóli hlaut fyrst allra skóla Íslensku menntaverðlaunin árið 2005.

Formenn Nemendafélagsins færðu Alexander Helga gjöf

Í dag, á alþjóðadegi kennara, beinum við sjónum okkar að mikilvægi kennarastarfsins og því ómetanlega hlutverki sem kennarar gegna í samfélaginu. Flest eigum við minningar um kennara sem höfðu sérstök áhrif á líf okkar og standa enn í hugum okkar sem fyrirmyndir. Ástæðurnar geta verið margar. Kannski var það kennari sem mætti okkur ávallt með jákvæðni og hlýju, vakti áhuga okkar á nýjum viðfangsefnum, miðlaði þekkingu af eldmóði eða veitti okkur stuðning og hvatningu þegar mest á reyndi. Góðir kennarar gera meira en að miðla þekkingu. Þeir byggja upp sjálfstraust, efla trú nemenda á eigin getu og leggja mikilvægan grunn að framtíð þeirra. Það er hvorki sjálfgefið að eiga góða kennara né að búa við öflugt skólastarf. Þess vegna er full ástæða til að staldra við, þakka fyrir vel unnin störf og fagna þessum mikilvæga degi. Alþjóðadagur kennara er haldinn hátíðlegur ár hvert þann 5. október, að frumkvæði UNESCO, Menningarmálastofnunar Sameinuðu þjóðanna, og hefur verið haldinn frá árinu 1994.  Við í Grundaskóla erum stolt af okkar kennurum og því mikilvæga starfi sem þeir sinna dag hvern. Innilegar hamingjuóskir með daginn og kærar þakkir fyrir fagmennsku, metnað og ómetanlegt framlag til skólasamfélagsins.

Í vikunni fengum við góða gesti frá Tékklandi í heimsókn í Grundaskóla. Um er að ræða starfshóp sem vinnur að menntastefnu landsins til ársins 2030. Gestirnir fengu kynningu á starfsemi og áherslum Grundaskóla, skoðuðu skólann og ræddu við bæði nemendur og starfsfólk. Heimsókninni lauk með samráðsfundi þar sem gestunum gafst tækifæri til að spyrja nánar út í skipulag skólastarfsins, kennsluhætti og þær áherslur sem einkenna starf skólans. Heimsóknin var skipulögð í samstarfi við barna- og menntamálaráðuneytið. Gestirnir lýstu mikilli ánægju með heimsóknina og voru sérstaklega hrifnir af aðstæðum, umhverfi og því starfi sem fram fer í Grundaskóla.  Það er ávallt ánægjulegt að fá tækifæri til að miðla af reynslu okkar, eiga samtal um skólaþróun og kynnast um leið áherslum og reynslu fólks sem starfar að menntamálum í öðrum löndum.

Þegar skemmtileg stærðfræðiþraut bíður nemanda í unglingadeild eru nemendur mættir fyrir allar aldir til að reyna að leysa hana 😃

Opni skólinn frístundanámskeið „Kleinugerð með afa og ömmu“ Fyrir foreldra og börn Ekki missa af þessu tækifæri til að gera eitthvað skemmtilegt með barninu þínu. Grundaskóli býður nú foreldrum og nemendum tengt áherslum Opna skólans upp á spennandi námskeið í kleinubakstri. Vinnusmiðju þar sem foreldrar og börn vinna saman og læra handbragðið af eldri kynslóð (ömmum eða öfum). Markmiðið er að kynnast betur, eiga skemmtilega stund saman, efla gagnrýna hugsun og lausnamiðaða nálgun.  Öll tæki og efniviður er til staðar og þurfa þátttakendur eingöngu að mæta með vilja og áhuga um að gera eitthvað skemmtilegt saman. Næsta tímasetning er miðvikudagurinn 7. okt. frá kl. 16 - 19 Þátttakendafjöldi er takmarkaður og hér gildir sem fyrr fyrstir koma fyrstir fá. Þátttökugjald er 1000 kr. á mann (2000 kr. á par) og gengur upp í efniskostnað Leiðbeinendur eru vanir kleinugerðarmenn og konur, afar og ömmur 😊

Börnin eru misjöfn og ekki dugar öllum að fá einungis ávexti og grænmeti í morgunhressingu

Áfall varð að tækifæri 

Frístund Grundaskóla hefur flutt starfsemi sína á ný yfir í Grundasel og verður þar til að annað er ákveðið. Miklar framkvæmdir voru fyrirhugaðar á Grundaseli og því starfsemin flutt tímabundið inn í aðalbyggingu Grundaskóla. Þessum framkvæmdum hefur nú verið frestað um óákveðin tíma. Fyrstu vikurnar hafa verið flóknar því hátt í 150 nemendur og starfsmenn koma saman í frístund skólans og aðstæður í aðalbyggingunni réðu illa við það samhliða hefðbundinni skólastarfsemi.  Frístund er því komin aftur heim á Grundasel og fer miklu betur um alla aðila, bæði yngri og þá sem eldri eru.

Það er samstarfsverkefni heimilis og skóla að tryggja börnum farsælt lestrarnám og góða lestrarfærni. Lestur er undirstaða alls náms og því mikilvægt að þjálfun hans fari jafnt fram í skóla og heima. Heimaþjálfunin eykur líkur á árangri. Hér eru tillögur að heimaþjálfun sem FLÍS félag læsisfræðinga á Íslandi tók saman.

Nemendur í unglingadeild voru duglegir í heimilisfræðinni og útbjuggu tortillupönnukökur alveg frá grunni ásamt fjölbreyttu meðlæti. Þau fengu tækifæri til að vinna sjálfstætt, prófa sig áfram og sjá hvernig einföld hráefni verða að góðri máltíð. Markmiðið var að nemendur læri að gera sjálfir og vita hvað er í matnum sem þau borða . Með því að útbúa matinn frá grunni fá þau betri innsýn í hráefnin, matreiðsluna og mikilvægi þess að geta bjargað sér í eldhúsinu.  Nemendur ganga vel um eldhúsið, halda vinnusvæðinu hreinu og leggja metnað í að ganga frá eftir sig. Það skilar sér í notalegu og góðu vinnuumhverfi þar sem allir geta notið sín.

Ólympíuhlaup ÍSÍ 2026 fór fram í flestum skólum landsins á síðustu dögum og tóku þúsundir nemenda og starfsmanna skólakerfisins sprettinn í nafni heilsueflingar.  Nemendur Grundaskóla hlutu á dögunum viðurkenningu ÍSÍ fyrir að hlaupa samtals 3302 km.

Fjórar vikur til stefnu

Gangbrautagæsla við Grundaskóla í allan vetur 

Minnum á reglur um útivistartíma barna og ungmenna.

Nemendur í 2. og 8. bekk tóku nýlega þátt í skemmtilegri útikennslu þar sem áhersla var lögð á samvinnu, samskipti og tengsl milli árganga . Nemendur unnu saman í blönduðum hópum og tókust á við náttúru-bingó þar sem þau þurftu að leita að ýmsu í umhverfinu. Meðal annars þurftu þau að fylgjast vel með náttúrunni, finna mismunandi hluti og leysa verkefnin í sameiningu.  Verkefnið gaf nemendum tækifæri til að kynnast hvert öðru, hjálpast að og læra hvert af öðru. Eldri nemendur fengu tækifæri til að leiðbeina og styðja þau yngri, á meðan 2. bekkur komu með forvitni, gleði og mikinn áhuga á verkefninu. Það var gaman að sjá hversu vel nemendur unnu saman og hvernig samvinna og góð samskipti gerðu útikennsluna bæði fræðandi og skemmtilega .

Í gær fengum við þær Evu Rún Þorgeirsdóttur, rithöfund, og Blæ Guðmundsdóttur, teiknara og barnabókahöfund, í heimsókn í Grundaskóla. Þær kynntu fyrir nemendum í 1.–7. bekk Svakalegu lestrarkeppnina, sem nú er hafin og við í Grundaskóla tökum auðvitað þátt.  Við hvetjum alla nemendur og foreldra til að taka höndum saman og vera einstaklega dugleg að lesa saman. Keppnin stendur til 6. október , svo nú er um að gera að grípa í góða bók og lesa sem mest.

„Þetta er bara algjör snilld, svo gaman að taka þátt.“ Fólk á öllum aldri er á einu máli um þátttöku á frístundanámskeiðum Opna skólans. Nemendur Grundaskóla, mömmur og pabbar, afar og ömmur hafa fjölmennt á frístundanámskeiðin sem hafa verið í boði og færri komist að en vilja. Fjölbreytt námskeið eru framundan og margt spennandi í boði fyrir alla fjölskylduna. Takk öll fyrir að taka þátt, það er gaman að vera saman.  Meðfylgjandi eru nokkrar myndir af okkar fólki á námskeiði tengt kleinubakstri.

Opni skólinn frístundanámskeið „Kleinugerð með afa og ömmu“ Fyrir foreldra og börn Ekki missa af þessu tækifæri til að gera eitthvað skemmtilegt með barninu þínu. Grundaskóli býður nú foreldrum og nemendum tengt áherslum Opna skólans upp á spennandi námskeið í kleinubakstri. Vinnusmiðju þar sem foreldrar og börn vinna saman og læra handbragðið af eldri kynslóð (ömmum eða öfum). Markmiðið er að kynnast betur, eiga skemmtilega stund saman, efla gagnrýna hugsun og lausnamiðaða nálgun. Öll tæki og efniviður er til staðar og þurfa þátttakendur eingöngu að mæta með vilja og áhuga um að gera eitthvað skemmtilegt saman. Tímasetning er þriðjudagurinn 22. Sept. frá kl. 16 - 19 Þátttakendafjöldi er takmarkaður og hér gildir sem fyrr fyrstir koma fyrstir fá. Þátttökugjald er 1000 kr. á mann og gengur upp í efniskostnað Leiðbeinendur eru vanir kleinugerðarmenn og konur, afar og ömmur 😊

Grundaskóli tekur þátt í Utís 2026 Föstudaginn 18. september kl. 13 hefst „Utís online ráðstefnan“ sem er orðinn einn stærsti endurmenntunarviðburður landsins. Um er að ræða tveggja daga rafræna ráðstefnu með um 20 fyrirlestrum um skólaþróun s.s. um Adhd sem ofurkraft, foreldrasamskipti, íþróttakennslu, sköpun, endurheimt mennskunnar í gervigreindar drifnum heimi, endurhugsað námsmat, ímyndunaraflið, lykilinn að læsi, kennslu í náttúruvísindum, raddbeitingu og ýmislegt annað áhugavert.  Fjöldi kennara og fagaðila í Grundaskóla eru skráðir til þátttöku á ráðstefnuna sem hefst kl. 13:00 á föstudaginn og stendur fram á miðjan dag á laugardegi.

Verkefnið Krakkar með krökkum fer vel af stað í Grundaskóla. 9. bekkur heimsækir 3.-6. bekk og þjálfast í leiðtogafærni og eru með jafningjafræðslu.

Öflugt og kraftmikið nemendaráð hefur tekið til starfa. Hlutverk nemendaráðs er að fjalla um margvísleg málefni er varða nemendur skólans og gæta hagsmuna þeirra er varða margvíslegar ákvarðanir og skipalag í starfinu.  Umsjónarmaður með ráðinu er Hilmar Halldórsson.

Opni skólinn frístundanámskeið „Kleinugerð með afa og ömmu“ Fyrir foreldra og börn Ekki missa af þessu tækifæri til að gera eitthvað skemmtilegt með barninu þínu. Grundaskóli býður nú foreldrum og nemendum tengt áherslum Opna skólans upp á spennandi námskeið í kleinubakstri. Vinnusmiðju þar sem foreldrar og börn vinna saman og læra handbragðið af eldri kynslóð (ömmum eða öfum). Markmiðið er að kynnast betur, eiga skemmtilega stund saman, efla gagnrýna hugsun og lausnamiðaða nálgun. Öll tæki og efniviður er til staðar og þurfa þátttakendur eingöngu að mæta með vilja og áhuga um að gera eitthvað skemmtilegt saman. Tímasetning er þriðjudagurinn 15. Sept. frá kl. 16 - 19  Þátttakendafjöldi er takmarkaður og hér gildir sem fyrr fyrstir koma fyrstir fá. Þátttökugjald er 1000 kr. á mann og gengur upp í efniskostnað Leiðbeinendur eru vanir kleinugerðarmenn og konur, afar og ömmur 😊

Veturinn fer vel af stað í smiðju hjá yngstu nemendunum okkar. Hér má sjá 1. bekk vinna að verkefnum eftir eigin hugmyndum Flottir nemendur sem eiga framtíðina fyrir sér 😊

Við byrjuðum skóla árið af krafti með því að tína sólber og rifsber til að gera sultu fyrir markaðinn Breytum krónum í gull sem haldinn verður seinna í vetur. Við munum gera sultuna í heimilis fræði. Þetta var skemtilegt haust verkefni þar sem var gamana að nýta góða veðrið og það sem nátúran gefur af sér .  Fréttina skrifuðu Dagur,Þorri og Freyja nemendur í 7. Bekk

Söngleikurinn FRELSI Undirbúningur fyrir söngleikinn Frelsi er kominn á fullt og það er sannkölluð tilhlökkun og spenningur í loftinu hjá nemendum í 10.bekk. Nemendur eru búnir að vera á fullu í dans-, söng- og leikprufum síðustu daga þar sem þeir hafa unnið saman í breytilegum hópum við að láta ljós sitt skína og allir hafa staðið sig með prýði! Nú fer að styttast í að nemendur fái úthlutuð hlutverk og þá hefjast æfingar á fullu. Söngleikurinn Frelsi er stórt og spennandi verkefni sem mun sameina og styrkja nemendur 10.bekk enn frekar! Hlökkum til að deila fleiri svipmyndum með ykkur á næstunni 😊

Kallað eftir framboðum til Skólaráðs Grundaskóla og í stjórn Foreldrafélags skólans Fulltrúar foreldra í skólaráð Grundaskóla Nú þarf að kjósa í skólaráðið okkar og því viljum við vekja athygli allra á að kosið verður í ráðið þann 15. sept. n.k. Þeir sem hafa hug á að bjóða sig fram sem fulltrúar foreldra (sjá nánar hér fyrir neðan) eru hvattir til að setja sig í samband við skrifstofu Grundaskóla ( grundaskoli@grundaskoli.is ) eða í síma 433-1400 og tilkynna um framboð. Helstu verkefni: Við grunnskóla skal starfa skólaráð sem er samráðsvettvangur skólastjóra og skólasamfélags um skólahald. Skólaráð tekur þátt í stefnumörkun fyrir skólann og mótun sérkenna hans. Skólaráð fjallar um skólanámskrá skólans, árlega starfsáætlun, rekstrar­ áætlun og aðrar áætlanir um skólastarfið. Skólaráð skal fá til umsagnar áætlanir um fyrirhugaðar meiri háttar breytingar á skólahaldi og starfsemi skóla áður en endanleg ákvörðun um þær er tekin. Skólaráð fylgist almennt með öryggi, aðbúnaði og almennri velferð nemenda. Skólaráð starfar samkvæmt reglugerð um skólaráð við grunnskóla. Fulltrúar eftirtalinna sitja í Skólaráði Grundaskóla Skólastjóri: B er ábyrgð á stofnun skólaráðs, boðar fundi og leiðir starf þess. Aðstoðarskólastjóri eða annar staðgengill er varamaður hans í skólaráði. Kennarar: Tveir fulltrúar kennara eru kosnir á kennarafundi og tveir til vara. Annað starfsfólk: Einn fulltrúi annars starfsfólks er kosinn á starfsmannafundi og einn til vara. Foreldrar: Tveir fulltrúar foreldra skulu kosnir og tveir til vara. Nemendur: Tveir fulltrúar nemenda skulu kosnir samkvæmt starfsreglum nemendafélags og tveir til vara. Fulltrúi grenndarsamfélags: Einn fulltrúi Hollvinafélags Grundaskóla og einn til vara eru fulltrúar úr grenndarsamfélaginu. Skólaráð getur tekið ákvörðun um að boða einstaklinga á fundi til að veita upplýsingar eða ráðgjöf í einstökum málum. Framboðsfrestur til Skólaráðs Grundaskóla rennur út 12. sept. n.k.

Á föstudaginn fórum við í 2. Bekk niður á Langasand í útikennslu. Við vorum einstaklega heppin með veður og nutum þess að leika okkur í sandinum. Við fundum allskonar fjársjóði í fjörunni og meira að segja fóru sumir aðeins að vaða. Kennsluefni dagsins voru tölurnar 1-10. Krakkarnir fundu í fjörunni jafn marga hluti og tölurnar sýndu. Einnig fórum við í fjörubingó þar sem allir leituðu að ýmsum hlutum úr fjörunni og merktu við. Kveðja, 2. bekkjarteymið

Alþjóðlegi treyjudagurinn til styrktar krabbameinssjúkum börnum var í dag. Nemendur Grundaskóla létu sitt ekki eftir liggja og mættu í skólann í hinum ýmsu keppnistreyjum. Að sjálfsögðu var ÍA treyjan áberandi en fjölbreytnin var við völd til að vekja athygli á mikilvægu baráttumáli.

Nú er 6. árið í Grundaskóla hjá árgangi 2015 hafið. Við sem vinnum með krökkunum getum ekki séð annað en að þau séu full af orku og ættu að geta nýtt hana til góðra verka í vetur.  Við nýttum góða veðrið í vikunni og fórum á Langasand.